ЭХАРТАХЬ ХIОРАНГА ХОТТУР ДОЛУ ДИЪ ХIУМА

БисмиллáхIир рахьмáнир рахьи́м
 

АллахIан элчано (АллахIера къинхетам а, маршо а хуьлда цунна) аьлла: «Цхьá лай (къемат-дийнахь) ша волчера (лаьттачера) меттах вер вац цуьнга хатталц:

1. Цуьнан оьмарха́ а  (дерриг а дахарха), и хIун деш яйина цо.

2. Цуьнан Iилманхá а, цунах хIун пайда бира цо.

3. Цуьнан дохнахá а, и мичара карадеара цунна, и муьлхачу агIор хьовзийра (дайира) цо.

4. Цуьнан дегIах лаьцнá а, цуьнга хIун дайтира цо аьлла». Ат-Тирмизий.

ХIокху хьадисо а, иштта кхечу хьадисаша а, а́йа́таша а гойту къематде доккха де хилар, муъма стаг а, зуда а хIокху доккхачу дийнах кхера дезаш хилар.

Амма кхузахь оцу доккхачу дийнан халонех хьалхабовлар шайна хирдолуш цхьа тайпа божарий а, зударий а бу, шайн хьокъехь хьадисаш а, а́йа́таш а даьхкина болу:

1- Декхар схьадала йиш йоцуш волчунна, цуьнан аьтто хиллалц хан елларг я и цунна дитинарг ву.

2- АллахIа Шениг бен IиндагI доцчу дийнахь Шен IиндагIехь вуьтун волу ворхI тайпа стаг а, зуда а ду:

3- (1) Iедале имам (куьйгалхо, доьзалан да, хьаьким) ву.

4- (2) АллахIана муьтIахь волуш кхиъна жима стаг а, зуда а ду.

5- (3) Шен дог даим маьждигашкахь лаьтташ верг ву.

6- (4) АллахIан дуьхьа вовшашна везна, доттагIалла а, гергарло а лелийна ши стаг ву. Валлалц оцу тIехь лаьттина, оцу тIехь дIа а кхелхина волу.

7- (5) ЧIогIа хазачу зудчо шега кхайкхича, дагара хаийтича: «Со АллахIах кхоьра» - аьлларг ву.

8- (6) ЧIогIа къайлаха сагIа делларг ву, аьтту куьйго делларг аьрру куьйгана ца хьоуьйтуш. (цхьанне ца хаийтина боху маьIна ду цуьнан).

9- (7) Шá волуш, дагчохь АллахI бен воцуш И хьаха а вина, И дага а веана вилхинарг ву.

Тхан хьоме йижарий, вежарий, царах цхьаъ хила гIерташ къахьегий вай, АллахI а, Цуьнан элча а (АллахIера къинхетам а, маршо а хуьлда цунна) резаварехула. АллахIа Фирдовс бохучу ялсаманахь цхьана тохийла вай!