ВЕСЕТАШ

БисмиллáхIир рахьмáнир рахьúм

Сан бусалба ваша, сан бусалба йиша, дуьненахь а, эхартахь  а декъал, ирсе, кхиам болуш хила лаахь, хIара весеташ кхочуш де:

1- Хьай деца-ненаца къамел гIиллакхе де. И шиъ а, цаьршима деш долу къамел а цадезаш «тпуй» ма ала. И шиъ чеха а маде. Сийлахь, лераме дош бен ма ала цаьршинга.

2- Даим хьайн дена-нанна муьтIахь хила АллáхIана Iеса йоцчу агIор. Махлýкъана (стагана) муьтIахь хила мегаш ца хиларна, Хáликъана (АллáхIана) Iеса хуьлчу агIор.

3- Хьайн деца-ненаца (даим) гIиллакх лáца. Цаьршина юьхь дуьхьал оьгIазе ма хьажа. ОьгIаз а вахна цаьршинна тIе ши бIаьрг ма богIа.

4- Хьайн ден-ненан яхана цIе а, цаьршина сий а, даьхни а лардан а, Iалашдан а хьажа. Цаьршина пурба доцуш цхьá хIума а схьамаэца.

5- Цаьршима хьоьга де ца аьллехь а, и шиъ самукъне хир долу хIума де: цаьршина гIуллакхе хьажар, оьшуш йолу хIуманаш эцар, дешарехь леррина къахьгар санна долу.

6- «Дика ду, сан нана, сан дá» - олуш, цаьршина кхайкхарна, елаеллачу юьхьца, дукха сиха жоп ло. Папа, мама ма ала, уьш вайн меттан дешнаш цахиларна.

7- Цаьршина доттгI а, гергарнаш а лара, церан пусар де, и шиъ дийна долуш а, деллачул тIахьа а.

8- Цаьршинца къийса а ма къийса, и шиъ галдаьлла ма лара. Нийсаниг, гIилкхаца, цаьршинна билгал дан гIорта.

9- Цаьршинна къарцалуш дуьхьал ма гIерта. Цаьршинна тIе а ма чеха. Цаьршинан къамеле (юкъа ца лелхаш) ладогIа. Цаьршинца гIиллакхе хила. Хьан вежарех цхьаьнна са ма гатде, хьан дега-нене болчу лерамна.

10- Хьан да-нана хьо волче чу деъча, дукха сиха цаьршинна дуьхьал хьалагIатта, цаьршинан коьртах барт а ло.

11- ЦIа чохь хьайн нанна гIо-накъосталла де. Хьайн дена цуьнан балха тIехь гIо-накъосталла дан хье ма ло.

12- Доккхачу гIуллакхана делахь а, цаьршина пурба доцуш цхьанхьа а ваха гена новкъа мавáла. Хьо ца вахча ца волуш хьал делахь, цаьршинна бехказа вáла. Хьайн зIе а ма хадае цаьршиннах.

13- Цаьршина пурба доцуш и шиъ долче чу ма гIо, къасттина и шиъ набарна тийначу а, цаьршима садоIчу а хенахь.

14- Хьо кIур ца баьккхича ца мегаш, ца Iалуш велахь, цаьршинна хьалха ма оза и.

15- Цаьршинал хьалха юучу хIуманна тIе ма кховда. Юучу а, молучу а хIумангахь сий а, ларам а бе цаьршина (тоьлашха ерг цаьршинна хьалха йилларца).

16- Цаьршинна тIехь эладита ма кхалла. Цаьршинна аьшпаш ма ботта. Хьуна хаза ца хеташ долу хIума цаьршима дича, цаьршинна бехк ма билла.

17- Хьайн зуда а, доьзалхо а цаьршиннал ма харжа. Массо а хIуманал хьалха и шиъ реза хилар лаха. АллáхI реза хилар и шиъ реза хиларха доьзна а, Иза огIаз вахар и шиъ огIаздахарха доьзна а хиларна.

18- Хьайн дена-нанна зиярат де кест-кеста, совгIаташ де царна. Хьо кхиаварна баркалла ала цаьршинна, хьо бахьана долуш цаьршима кIадлуш къахьегарна. Хьайн берашца а, ахь цаьрца хьоьгуш долчуьнца а тергам лаца.

19- Лерам а, сий а дан нахаха уггар хьакъ верг хьан нана ю, цуьл тIаьхьа хьан да ву. Хаалахь, сан бусалба ваша, сан бусалба йиша, ялсамане нанойн когаш кIел хилар.

20- Да-нана оьгIаз дахарха а, цаьр шина вон хиларха ларлолахь. Иштта хьо ца хилахь, дуьненахь а, эхартахь а дакъазвалар хир ду хьуна. Хьан доьзал а хир бу хьуна хьоьца, хьо хьайн деца-ненаца хиларе терра.

21- Хьайн де-ненера хьо цхьахIума йоьхуш велахь, цаьршинца гIиллакхе кIеда-мерза хилалахь. Цаьршима хьуна лахь, цаьршинна баркалла алалахь, цаьршима хьуна ахь йоьхург ца лахь, и шиъ бехказа диталахь. Хьайн ехарш цаьршинга дукха ма хилийта, цаьршинан сацагатдаран дуьхьа.

22- Рицкъа лаха гIор долуш хьо дIахIоттича, хьайн дена-нанна, болх беш, гIодан хьажа.

23- Хьайн дена-нанна хьуна тIехь хьакъ ду хьуна. Хьан зудчунна хьуна тIехь хьакъ ду хьуна. Цундела, хIора хьакъ дена цуьнан хьакъ дIалолахь. Цаьршинан къовсам хилча бартбан гIорталахь цаьршина юкъахь. Шина а агIонна вовшашна ца хоуьйтуш совгIат де.

24- Хьан ден-ненан, хьан зудчуьнца довдаьлча хьекъал, кхетам болуш хилалахь. Хьайн зуда кхетае хьо цуьнгахьа хиларха, и бакълуьйш елахь, хьо и шиъ реза ца дича цаволуш хиларха а.

25- Хьан деца-ненаца хьан ойла цхьана ца еъча зуда ялоран я йитаран хьокъехь, и гIуллакх къастадар шарIе дилла, иза шуна дика гIо ду шуна.

26- Дас-нанас диканца а, вонца а дина доIанна жоп луш ду шуна. Цундела, вочуьнца цаьршима хьайна доIа дарха ларлолахь.

27- Адамашца девнаш цадохуш гIиллакхе хилалахь. Нахана лийначунна, уьш а луьйр бу хьуна цунна. Пайхамара – IалайхIис-салáм, аьлла: «Даккхийчу къинойха ду стаг шен дена-нанна лер: стеган дена луьйр ву и, тIаккха иза цуьнан дена луьйр ву. Цуьнан нанна луьйр ву и, тIаккха иза хIоккхуьнан нанна луьйр ву». Бухарий, Муслим.

28- Хьайн дена-нанна зиярате гIо и шиъ дина долуш а, и шиъ деллачул тIаьхьа а. Цаьршинна тIера сагIа а ло. Цаьршинна дукха хIокху дешнашца доIа де: «Сан дела, суна а, сан дена-нанна а гечде ахь». «Сан дела, цаьршиннах къинхетам бе ахь, цаьршима со жима волуш (къа а хеташ) кхиаварах терра».

Кечдинарг: Саййид Iабдур-Рахьмáн Ас-СубайхIий

Гочдинарг: ИбрахIим

Оршот, 3 Овхаран бутт «Август» 2009 шо.