АсмаIийс (АллахIа къинхетам бойла цунах), дуьйцу: «Со Маккахь а волуш мархийн бутт тIебеара. ТIаккха со ТIáифе ваха аравелира, Маккахь йолчу йовхонах ведда. 

Со новкъаваьлла воьдуш а волуш, цхьа акха Iарби дуьхьалакхийтира суна. 

Ас хаьттира цуьнга: «Хьо стенга воьду» — аьлла? 

Цо элира: «Беркатечу Макка воьду со, беркате мархийн бутт цигахь кхабархьама». 

Ас хаьттира цуьнга: «Йовхонах ца кхоьру хьо?». 

Цо элира: «Цу йовхонах ведда воьдуш ву-кхи со а цига»». (Акха Iарбичо юьйцург, жоьжахатин цIеран йовхо яра). 

ал-Кáмилу филлугIати валадаби, 1/163.

Лараме вежарий, йижарий!

Бертте беана тIехIоьтти вайна мархийн бутт.

И Рамадан бутт бу и, хийлаза АллахIах кхоьруш болучара шега сатийсина болу.

И Рамадан бутт бу и, хийлаза дикачу нехан синоша шега сатийсина болу.

Дерриг дика а, беркат а шена чохь долу цу батте дегнаша са муха тосур дацара?!

Шена чохь шортта гечдар а, къинхетам а болу цу батте дегнаша са муха гатдийра дацара?!

Я АЛЛАХI РАМАДАН БАТТЕ ДАХА АХЬ ТХО.

Имам ал-Хьасан ал-Басрийс (АллахIа къинхетам бойла цунах), аьлла: Дуьне — кхо де ду: 

Селхане ю. Иза шен чохь мел долчуьнца дIаяхана. 
Кхане ю. Хьо цуьнга волий а ца хаьа. 
Тахане ю. Ткъа иза хьан керахь ю, цундела, дика Iамалш е цу чохь. 

аз-ЗухIд лил-БайхIакъий, 196.